A kam besim në hirin shenjtërues kur frikësohem?

Dec 20 • Meditimi i ditës, Uncategorized

20 dhjetor 2016, E martë, MOMENTI I SHENJTË – Lutja e përditshme

(Leximet e ditës: Is 7,10-14; Ps 24,1-4b.5-6; Lk 1,26-38)

 

Prania e Hyjit
O Zot, në thjeshtësi dhe përvujtëri po vij tek ti.

Fjalët e tua më çojnë në paqe në të cilën e kuptoj madhërinë dhe domethënien e pranisë sate.

 

Liria

Duhet të shkëputem nga zhurma; të ngrihem mbi zhurmën;

zhurmën që e ndërpret marrëdhënien e vendosur, që ndanë.

Duhet t`i kthehem dëgjimit të Hyjit.

 

Ndërgjegjësimi

E pyes veten, ç`po ndiej sot në vete?
A jam ndoshta i/e lodhur, nën stres apo jashtë forme?
Nëse diçka prej kësaj ekziston në mua,
a mund të provoj t`i hedh tej këto brenga që më shqetësojnë?

 

Fjala

Do t`i jap vetes kohë që ta lexoj Fjalën e Hyjit pa u ngutur, disa herë,

dhe do të ndalem në atë fjalë apo ngjarje që më prek, që më flet pikërisht mua.

  

Lk 1, 26-38

 

26 Në të gjashtin muaj, Hyji e dërgoi engjëllin Gabriel në një qytet të Galilesë, që quhet Nazaret, 27 te një virgjër, që ishte e fejuar me një njeri, që quhej Jozef, prej fisit të Davidit. Virgjëra quhej Mari.

28 Engjëlli hyri tek ajo dhe i tha:

“Të falem, o Hirplote! Zoti me ty!”

29 Kjo fjalë e shqetësoi Marinë dhe zuri të mendojë: ç’do të thotë kjo përshëndetje.

30 Por engjëlli i tha:

“Mos ki frikë, o Mari, sepse ke gjetur hir para Hyjit!

31 Ja, do të mbetesh shtatzënë e do të nxjerrësh në dritë një djalë e ngjitja emrin Jezus. 32 Ky do të jetë i madh dhe do të quhet Biri i Hyjit tejet të lartë. Zoti Hyj do t’ia japë fronin e Davidit, atit të tij. 33 Ai do të mbretërojë përgjithmonë mbi shtëpinë e Jakobit dhe mbretëria e tij s’do të ketë mbarim.”

34 Atëherë Maria i tha engjëllit:

“Si do të mund të ndodhë kjo, ndërsa unë jam virgjër?”

35 Engjëlli iu përgjigj:

“Shpirti Shenjt do të zbresë në ty e fuqia e Hyjit të tejetlartë do të të mbulojë me hijen e vet; prandaj ky Fëmijë do të jetë i shenjtë ‑ Biri i Hyjit. 36 Dhe ja, Elizabeta, kushërira jote, edhe ajo, në pleqërinë e saj, pret t’i lindë djali. Ajo që mbahet beronjë, është në të gjashtin muaj. 37 Vërtet, s’ka gjë të pamundshme për Hyjin!

38 Atëherë Maria tha:

“Unë jam shërbëtorja e Zotit: Më ndodhtë siç the ti!”

Atëherë engjëlli u largua prej pranisë së saj.

 

Ç`dëshiron të më thuash, Zotëri?

Disa mendime mbi pjesën e leximit të sotshëm të Shkrimit Shenjt:

 

  • Do të lejoj të më përshkojë ndikimi i mistershëm dhe i mrekullueshëm i Zotit. Nazareti ishte një qytet jo shumë i rëndësishëm, mezi i dukshëm në hartën gjeografike. Maria nuk ka ndonjë pozitë shoqërore; ajo është vajzë e re në një botë që e respekton moshën, në një botë ku sundojnë meshkujt, e varfër në shoqërinë ku çmohet pasuria. Megjithatë, kjo vajzë e pa rënë në sy është zgjedhur për të qenë Nënë e Hyjit!
  • Engjëlli i thotë Marisë që mos të ketë frikë, ajo ka gjetur hir para Zotit. A e njoh edhe unë këtë ndjenjë – frikën, kur jam i/e grishur që një nxitje ta vë në zbatim, veçanërisht atë që vjen nga besimi? Dhe a kam besim në hirin shenjtërues? Çka po më bie ndër mend nga jeta ime? Mund t`ia paraqes Zotit, pa marrë parasysh se si e kam përjetuar atëherë veten.
  • Luka e vë përballë Jezusin dhe Gjonin. Gjoni vërtetë do të jetë i madh, mirëpo Jezusi do të jetë shumë më i madh dhe Bir i Tejetlartit. Roli i Gjonit do të jetë i përkohshëm ndërsa mbretëria e Jezusit nuk do të ketë mbarim. Do të lus që këto dallime të ma ndriçojnë rëndësinë kulmore të personit të Jezusit për mua.

 

Bashkëbisedimi

O Zot i dashur, ji pranë meje gjithmonë.

Ma jep një zemër e cila gjithmonë do të të besojë.

Faleminderit që më do.

 

Përmbyllja

Të falënderoj, o Zot, për çdo nxitje që ma dhurove gjatë kësaj kohe që luta mbi tekstin e Shkrimit Shenjt.

Lavdi Atit e Birit e Shpirtit Shenjt.
Si ka qenë në fillim, ashtu tash
e përgjithmonë e jetës. Amen.

Shpërndaje

Comments are closed.

« »