A i vlerësoj më shumë të refuzuarit e kësaj bote?

Dec 22 • Meditimi i ditës

22 dhjetor 2017 – E premte, MOMENTI I SHENJTË – Lutja e përditshme

(Leximet e ditës: 1 Sam 1 24-28; Ps 1 Sam 2,1-7; Lk 1,46-56)

Prania e Hyjit

Është gjë e mrekullueshme të jesh së bashku me shokë, në afërsinë e tyre.

Kur jam me ty, o Zot, e di se jam në praninë e Krijuesit tim.

Më ke krijuar nga dashuria.

Madje të gjitha flokët e kresë i kam të njehura.

Prania jote, o Zot, është më e madhe se gjithçka.

Liria

O Zot, ma ke dhënë dhuratën e madhe të lirisë.
Ma jep hirin që të mund të jem i/e lirë nga çdo formë urrejtjeje dhe padurimi.

Ma përkujto, o Zot, se në sytë e tu të gjithë jemi të barabartë.

Ndërgjegjësimi

Të jesh i vetëdijshëm për diçka do të thotë këtë edhe ta vëresh.
O Zot, më ndihmo që gjithmonë të jem i/e vetëdijshëm/e se ma ke dhuruar jetën;
të falënderoj për këtë dhuratë të jetës.
Më mëso se si të koncentrohem dhe të jem i/e qetë si dhe të kënaqem në sendet që i ke krijuar për mua.
Që ta sodis bukurinë që më rrethon,
mrekullitë e majave të maleve, qetësinë e liqenit, thyeshmërinë e gjethes së lules…
Gjithmonë nevojitet të jem i/e vetëdijshëm se të gjitha këto vijnë prej teje.

Fjala

Do t`i jap vetes kohë që ta lexoj Fjalën e Hyjit ngadalë, disa herë,

dhe do të ndalem në atë fjalë apo fjali që më prek, që më flet pikërisht mua.

Lk 1, 46-56

⁴⁶ Atëherë Maria tha:

“Shpirti im e madhëron Zotin,

⁴⁷ shpirti im me hare i brohorit Hyjit, Shëlbuesit tim,

⁴⁸ sepse shikoi me pëlqim mbi shërbëtoren e vet të përvuajtur:

ja, që tani të gjitha breznitë do të më quajnë të lumtur,

⁴⁹ sepse punë të mëdha bëri për mua Hyji i gjithëpushtetshëm

‑ i shenjtë është i tij!

⁵⁰ Mëshira e tij brezni më brezni

për ata që e druajnë.

⁵¹ E tregoi fuqinë e krahut të vet:

i hodhi poshtë qëllimet e krenarëve,

⁵² i rrëzoi princat prej froneve të tyre

e i lartësoi të përvuajturit.

⁵³ Me të mira i mbushi ata që s’kishin ç’të hanë

e të pasurit i nisi duarthatë.

⁵⁴ I ndihmoi Izraelit, shërbëtorit të vet,

duke e sjellë në mend mëshirën

⁵⁵ ‑ si ua pati premtuar etërve tanë ‑

në të mirën e Abrahamit e të pasardhësve

të tij në amshim.”

⁵⁶ Maria ndenji me Elizabetën rreth tre muaj e atëherë u kthye në shtëpinë e vet.

Ç`dëshiron të më thuash, Zotëri?

Disa mendime mbi pjesën e leximit të sotshëm të Shkrimit Shenjt:

• E paramendoj se jam i/e grishur të qëndroj së bashku me Elizabetën dhe Marinë tre muaj. E vështroj çka flasin dhe bëjnë dhe se si janë të lumtura pa bërë zhurmë ndërsa janë duke e mbartur misterin e Zotit në kraharorin e tyre.
• Maria e lavdëron Zotin se po e rrotullon historinë njerëzore. Hyji i hedh poshtë qëllimet e krenarëve, i rrëzon princat prej froneve të tyre, kurse të pasurit i nis duarthatë. Në vendin e tyre i lartëson të përvuajturit dhe iu jep të hanë skamnorëve.
• A i vlerësoj më shumë të refuzuarit e kësaj bote apo të njohurit dhe pasanikët? Për këtë do të bisedoj me Marinë.   

Bashkëbisedimi

O Zot i dashur, ji pranë meje gjithmonë.

Ma jep një zemër e cila gjithmonë do të të besojë.

Faleminderit që më do.

Përmbyllja

Të falënderoj, o Zot, për çdo nxitje që ma ke dhuruar gjatë kësaj kohe të lutjes mbi tekstin e Shkrimit Shenjt.

Lavdi Atit e Birit e Shpirtit Shenjt.
Si ka qenë në fillim, ashtu tash 
e përgjithmonë e jetës. Amen.

« Programi i Krishtlindjes 2017 në Katedralen Shën Nënë Tereza në Prishtinë Virgjëra do të mbesë shtatzënë e do ta lind një djalë! »