Fuqia tërheqëse dhe shëruese e Jezusit

Jan 18 • Meditimi i ditës

18 janar 2018 – E enjte, MOMENTI I SHENJTË – Lutja e përditshme

(Leximet e ditës: 1Sam 18,6-9; 19,1-7; Ps 56,2-3.9-14; Mk 3,7-12)

Prania e Hyjit

E mrekullueshme është të jesh së bashku me shokë, në afërsinë e tyre.

Kur jam me ty, o Zot, e di se jam në praninë e Krijuesit tim.

Më ke krijuar prej dashurisë.

Madje të gjitha flokët e kresë i kam të njehura.

Prania jote, o Zot, është më e madhe se gjithçka.

Liria

Lehtë është të biesh në kurthin e pasurisë së kësaj bote.

Më jep hirin, o Zot, që të mund të jem i-e lirë nga lakmia dhe egoizmi.

Ma përkujto se gjërat më të mira në jetë janë falë – gratis.

Dashuria, buzëqeshja, përkujdesjen dhe bashkimi.

Ndërgjegjësimi

E di që Zoti më do pa kushte.

Për këtë arsye me sinqeritet e vështroj ditën që po kalon, ngjarjet dhe përjetimet.

A ekziston diçka që duhet të jem mirënjohës? Atëherë do të falënderohem.

Diçka që ndjehem fajtor? Atëherë do të lus për falje.

Fjala

Në gjendjen e tanishme të shpirtit përqendrohu në tekstin e sotshëm me mirëbesim, shpresë.

Beso se Shpirti i Shenjtë është i pranishëm

dhe se ai mund të të frymëzojë që ta zbulosh çka po të flet ky tekst i sotshëm.

Lexoje me vëmendje dhe me kuptim; përgjo çfarë po ngjanë në zemrën tënde.

Mk 3, 7-12

⁷ Jezusi me nxënësit e vet u shmang kah bregu i detit. E ndiqte një turmë e madhe populli prej Galilesë. Gjithashtu edhe prej Judesë, ⁸ prej Jerusalemit, prej Idumesë, prej Transjordanisë e prej rrethit të Tirit e të Sidonit ‑ turmë e madhe ngarendi tek ai, pse dëgjuan ç’bënte.

⁹ Prandaj u tha nxënësve të vet ta kenë përherë gati një lundër që turma e popullit të mos e shtrydhte. ¹⁰ E meqenëse shëroi shumë ‑ të gjithë të sëmurët turreshin drejt tij për ta prekur. ¹¹E shpirtrat e ndytë kurdoherë e shihnin, binin përmbys para tij e bërtisnin: “Ti je Biri i Hyjit!” ¹² Por Jezusi u urdhëronte rreptësisht të mos dëftonin se kush është.

Ç`dëshiron të më thuash, o Zot?

Disa mendime mbi pasazhin e sotshëm të Shkrimit Shenjt:

• Këtu zbulohet fuqia tërheqëse e Jezusit. “Njerëz të zakonshëm, të parëndësishëm” i përgatisin Jezusit një mirëseardhje të ekzaltuar. I afroheshin me një dëshirë – që t`i prekte dhe t`i shëronte. Fuqia e dashurisë del nga Jezusi.
• A jam i/e vullnetshëm/e t`i bashkëngjitem ekzaltimit të masës së njerëzve të varfër? A mund ta pranoj që edhe unë kam nevojë për prekjen e Birit të hyjit që shëron?

Bashkëbisedimi

Fjalët tua, o Zot, më mësojnë se si duhet të lus.

Urata e mrekullueshme Ati ynë

përmban të gjitha ato që dëshiroj të them.

Përmbyllja

Po të falënderoj o Zot për çdo nxitje që ma dhurove gjatë këtyre momenteve të kaluara vetëm me ty.

Lavdi Atit e Birit e Shpirtit Shenjt.

Si ka qenë në fillim ashtu tash

E përgjithmonë e jetës. Amen.

« Mesazhi i Paqes 2018/Migrantët dhe refugjatët: burra e gra në kërkim të paqes! Identifikim jete »