Zoti më do pavarësisht se si sillem

Zoti më do pavarësisht se si sillem

Mar 2 • Meditimi i ditës

2 mars 2018 – E premte, MOMENTI I SHENJTË – Lutja e përditshme

(Leximet e ditës: Zan 37,3-4.12-13.17-28; Ps 104; Mt 21,33-43.45-46)

Prania e Hyjit

Shpirti im me afsh e dëshiron praninë tënde, o Zot.

Kur i drejtoj mendimet e mia kah ti,

e gjej paqen dhe pushimin.

Liria

S`ka situatë prej së cilës nuk do të mund të dilja më i/e pasur me dashuri dhe jetë.

Mirëpo, dëshirat e mia janë shpesh herë të fiksuara, të robëruara në iluzione se të gjitha duhet qenë të plotësuara.

I lutem Hyjin që nëpërmjet lirisë time

t`i bëjë dëshirat e mia këngë melodie gjallëruese të një dashurie plot harmoni.

Ndërgjegjësimi

Bëj, o Zot, që gjithmonë të jem i/e vetëdijshëm dhe mirënjohës/e

për të gjitha bamirësitë që m`i ke dhënë.

Këtë bekim ta ndaj gjithmonë me të tjerët.

Fjala

Në gjendjen e tanishme të shpirtit përqendrohu në tekstin e sotshëm me mirëbesim, shpresë.

Beso se Shpirti i Shenjtë është i pranishëm

dhe që ai mund të të frymëzojë ta zbulosh çfarë po të flet ky tekst i sotshëm.

Lexoje, dëgjoje me vëmendje dhe me kuptim; vërja veshin çfarë po ngjanë në zemrën tënde.

Mt 21, 33-43.45-46

³³“Dëgjojeni shëmbëlltyrën tjetër:

Ishte një zot shtëpie që kishte mbjellë një vresht. E thuri me gardh, punoi shtrydhësin e rrushit, ndërtoi kullën, ua dha vreshtarëve ta punojnë për gjysmë dhe shkoi në vend të huaj.

³⁴ Kur u afrua koha e të vjelave, dërgoi te vreshtarët shërbëtorët e vet për të marrë frytin që i takonte. ³⁵ Vreshtarët i kapën shërbëtorët: njërin e rrahën, një tjetër e mbytën e një tjetër e vranë me gurë. ³⁶ Prapë dërgoi shërbëtorë të tjerë, më shumë se të parët, porse edhe atyre ua bënë ashtu.

³⁷ Në fund dërgoi të birin duke menduar: ‘Do të kenë nderim ndaj djalit tim!’ ³⁸ Porse vreshtarët, kur e panë djalin i thanë njëri‑tjetrit: ‘Ky është trashëgimtari! Ejani ta vrasim dhe neve do të na mbesë pasuria e tij.’ ³⁹ E kapën, e qitën jashtë vreshtit dhe e vranë.

⁴⁰ Tashti, kur të vijë i zoti i vreshtit, çka do t’u bëjë këtyre vreshtarëve?”

⁴¹ Iu përgjigjën:

“Të këqijtë do t’i shfaros keqas e vreshtin e vet do t’ua japë vreshtarëve të tjerë, të cilët do t’i japin frytin posa të vijë koha e të vjelave.”

⁴² Jezusi u tha:

“A nuk e lexuat asnjëherë në Shkrimin e shenjtë:

‘Guri që ndërtuesit e qitën jashtë përdorimit

u bë guri i këndit;

kjo është vepër e Zotit,

sa mrekulli në sytë tanë!’

⁴³ Prandaj ‑ po ju them ‑ juve do t’ju hiqet dore Mbretëria e Hyjit e do t’i jepet një populli që i prodhon frytet e saj!”^[44].

⁴⁵ Kryepriftërinjtë e farisenjtë, kur i dëgjuan shëmbëlltyrat e tij, e morën vesh se po fliste për ta. ⁴⁶ Kërkonin ta zinin, por druanin popullin sepse e mbante për profet.

Ç`dëshiron të më thuash, o Zot?

Disa mendime mbi pasazhin e sotshëm të Shkrimit Shenjt:

Një nga deklaratat nga më të dhimbshmet të Ungjillit është komenti i babait të pafajshëm: “Ata do të respektojnë djalin tim.” Kam frikë edhe t`i çoj mendtë se çfarë do të ndodhte nëse Jezusi do të vinte sot në botën tonë.Mesazhi i tij në lidhje me Mbretërinë e Hyjit do ta vendoste atë në kundërshtim me shumë mbretëri të sotme. Ai do të bëhej armiku që do duhej eliminuar.
Jezus, të hodhën jashtë dhe të vranë. Por ti nuk je hakmarrë. Në vend të kësaj, ti i ke justifikuar torturuesit e tu dhe me anë të dashurisë sate i ke pajtuar njerëzit me Hyjin. E ke treguar se si duket dashuria hyjnore. Mëdo pavarësisht se si sillem. Bëj që të tjerëve gjithmonë të mund t`ua dua të mirën dhe në vend të hakmarrjes të lutem për ta kur më lëndojnë.

Lexoje, dëgjoje pjesën e leximit të Shkrimit Shenjt, pa u ngutur, nëse duhet disa herë, dhe shih a ka ndonjë fjalë a ngjarje që të flet në mënyrë të veçantë, dhe qëndro më atë rast aq gjatë sa të flet para se të vazhdosh tutje.

Bashkëbisedimi

Talenti i të folurit është një dhuratë e jashtëzakonshme.

Bëj që këtë dhuratë të mund ta përdori me dashamirësi.

Qofsha i ngadalshëm kundrejt fjalëve të vrazhda që plagosin,

kundrejt fjalëve të thëna në zemërim.

Përmbyllja

Po të falënderoj, o Zot, për çdo nxitje që ma dhurove gjatë këtyre momenteve me ty.

Lavdi Atit e Birit e Shpirtit Shenjt.

Si ka qenë në fillim ashtu tash

E përgjithmonë e jetës. Amen.

Shpërndaje