T`ia dëshirosh vetvetes lirinë që Zoti ta dëshiron

Apr 10 • Meditimi i ditës

10 prill 2018 – E marte, MOMENTI I SHENJTË – Lutja e përditshme

(Leximet e ditës: Vap 4, 32-37; Ps 92; Gjn 3, 7b-15)

 

Prania e Hyjit

Kur jam i/e thirrur të rri bashkë me shokun/shoqen, me miq,

mezi e pres këtë dhe e ndiej veten se po më bëhet nder.

Kur Zoti më thërret që ta kaloj kohën në afërsinë e tij,

Ai dëshiron ta njoh dhe ta ndiej dashurinë e tij.

Me besim dhe fe e hapi mendjen dhe zemrën time para Hyjit,

dhe e lus që të më ndihmojë që të bëhem edhe më i/e vetëdijshëm/e për dashurinë dhe praninë e tij.

 

Liria

Lutem për hirin e fesë, të besoj

në gjithë atë çka do të mund të bëhesha dhe të bëja

vetëm po t`i dorëzohesha Hyjit, atij që krijon gjithçka nga dashuria,

që të vazhdojë të më krijojë, udhëheqë dhe formojë.

 

Ndërgjegjësimi

Ku, në çka në jetën time jam duke e gjetur shpresën, guximin dhe rritjen?

Duke u kthyer në mendime disa muaj prapa,

a jam i/e aftë të vërej cilat janë ato aktivitete të mia që kanë dhënë fryt të pasur?

Nëse i kam vërejtur këto lëmi,

do të vendosi që në të ardhmen t`iu siguroj hapësirë dhe kohë.

 

Fjala

E lexoj, dëgjoj Fjalën e Hyjit, i lejoj të jehojë në zemrën time dh vërej çfarë po më flet Zoti.

 

Gjn 3, 7-15

 

Në atë kohë Jezusi i tha Nikodemit:

7 Mos u çudit që të thashë:

‘Duhet të lindni përsëri prej së Larti.’

8 Era fryn në drejtimin që do;

ia dëgjon ushtimën

e nuk di nga vjen e kah shkon.

Kështu ndodh edhe me secilin

që lind prej Shpirtit.”

9 Nikodemi e pyeti:

“Si mund të bëhet kjo gjë?”

10 Jezusi iu përgjigj:

“Ti je mësues i Izraelit e nuk merr vesh kaq?

11 Për të vërtetë, për të vërtetë, po të them:

ne flasim çka dimë

e dëshmojmë çka pamë,

e megjithatë nuk e pranoni dëshminë tonë.

12 Nëse nuk më besoni

kur ju flas për gjëra që ndodhin në tokë

si do të më besoni

në qoftë se ju flas për gjërat e qiellit?

13 Askush nuk u ngjit në qiell,

përveç Birit të njeriut

që zbriti nga qielli.

14 Dhe, sikurse Moisiu e lartësoi

gjarprin në shkretëtirë,

po ashtu duhet të lartësohet edhe Biri i njeriut,

15 që kushdo të besojë në të

ta ketë jetën e pasosur.

 

Çfarë dëshiron të më thuash, Zotëri?

Disa mendime mbi pasazhin e sotshëm të Shkrimit të Shenjtë:

 

  • Nikodemi ishte një mësues i mençur, por i mungonte një urtësi e caktuar. I mësuar të citonte doktrinën zyrtare, nuk ishte në gjendje të njihte pushtetin e Jezusit, i cili mirë e dinte se çfarë fliste.
  • Para Hyjit i pranoj zakonet, shprehitë, prirjet e mia dhe atë çfarë preferoj. E lus Hyjin që të ma japë lirinë që kam nevojë në mënyrë që të më prek fjala e Jezusit, që ta zgjoj imagjinatën, që t`ia dëshiroj vetvetes lirinë që ai ma dëshiron.

Kthehu te Fjala e Zotit. Lexoje, dëgjoje edhe një herë. Vështroje, dhe lejoji të të ndryshojë.

 

Bashkëbisedimi 

Si reagoj kur lus në bazë të Shkrimit Shenjt?

A jam i/e ngushëlluar, i/e shqetësuar, apo kam mbetur i/e ftohtë?

E paramendoj Jezusin sesi qëndron apo rri ulur pranë meje

Dhe i tregoj gjithçka ndjej.

 

Përmbyllje

O Zot, faleminderit, për këto pak momente që i kalova vetëm me ty.

Lavdi Atit e Birit e Shpirtit Shenjtë.

Si ka qenë në fillim, ashtu tash

e përgjithmonë e jetës. Amen.

Shpërndaje

Comments are closed.

« »