Sa i kultivoj marrëdhëniet e drejta me krijimin?

Jan 16 • Meditimi i ditës

16 janar 2019 – E mërkurë, MOMENTI I SHENJTË – Lutja e përditshme

(Leximet e ditës: Heb 2,14-18; Ps 104,1-4.6-9; Mk 1,29-39)

 


Prania e Hyjit

Bekoje, shpirti im, Zotin, që jetën ma dhuron – që më drejton në jetë.

Gjëja më e rëndësishme për mua që tani të bëj, ndërsa hyj në lutje, është që të lirohem një moment, t`i lëshoj shqetësimet e mia, brengat, frikën dhe ngurrimin tim, dhe t`i lejoj vetes të udhëhiqem nga Hyji duke besuar se Hyji, që më do, do të më çojë në jetë.

 


Liria
O Zot, Hyj, po të falënderoj për dhuratën e lirisë.

Më ndihmo që këtë dhuratë ta përdori në mënyrë të përgjegjshme. Jam i lirë të përzgjedh.

Më ndihmo që të përzgjedh që të ndjek ty,

që të jetoj një jetë të krishterë duke u kujdesur për të tjerët.

Më ndihmo që t`i kujtoj ata që janë të palumtur, të nëpërkëmbur;

ata në burg, ata që nuk janë të lirë ta shprehin publikisht fenë e tyre.

Më udhëheq që gjithmonë dhe në gjithçka ta kërkoj vullnetin tënd, në të gjitha sendet që ndodhin në jetën time.

 


Ndërgjegjësimi

Në praninë e Zotit që më do

E vështroj gjithë atë çfarë më ka ndodhur ditën që kaloi,

prej këtij momenti në mënyrë retrospektive.

Ia kujtoj vetes atë që ka qenë e mirë dhe e bukur, dhe falënderoj për këtë.

I vërej edhe hijet, gabimet dhe pyet çfarë më flasin; lutem për shërim, guxim, falje.

 

Fjala

Zoti na dëfton veten e vet me anë të shkrimeve të shenjta.
Lexoje, dëgjoje tekstin
 e sotëm biblik
dhe lejoj
vëmendjes sate të pushojë nëdisa pjesë të tij.


 

Ps 104,1-4.6-9

 

1 Bekoje, shpirti im, Zotin!

O Zot, Hyji im, sa i madh je!

I veshur me madhëri e me bukuri,

2 i mbështjellë me dritë porsi me petk!

E ngreh qiellin porsi tendë,

3 mbi ujëra ndërton banesat e tua.

Retë i bëre karrocë për vete,

ecën mbi krahët e erës!

4 Erërat i bën lajmëtarë të tu,

zjarrin zharitës shërbëtorë të tu.

5 Tokën e vendose mbi qëndrueshmërinë e saj,

nuk do të lëkundet në shekuj të shekujve.

6 E mbulove si me petk me ujërat e humnerave,

majat e maleve i mbulonin ujërat:

7 Ti u kërcënohesh e ato tërhiqen,

dridhen nga zëri i bubullimës sate:

8 ngjiten në male, zbresin në lugina

drejt vendit që ti u cakton:

9 u ke vënë cakun që s’guxojnë ta kalojnë,

që përsëri të mos e mbulojnë tokën.


 

Çfarë dëshiron të më thuash, Zotëri?

Disa mendime mbi fragmentin e sotshëm të Shkrimit Shenjt:

 

  • Kjo këngë e krijimit është një mundësi e mrekullueshme për të reflektuar mbi thirrjen tonë për të jetuar në mënyrë të qëndrueshme. Ne e përjetojmë lavdinë e Hyjit nëpërmjet krijimit dhe i japim lavdi Hyjit duke punuar me krijimin dhe duke e respektuar atë. E pra, sa abuzohet dhe hidhet poshtë në botën tonë sot lavdia e Hyjit?
  • Hyji është burimi i gjithë jetës dhe marrëdhënia midis njerëzimit, Hyjit dhe krijimit është e rëndësishme në shkrimet e shenjta, siç duhet të jetë në jetën tonë të përditshme. Marrëdhëniet e drejta me Hyjin, me njëri-tjetrin dhe me krijimin, kultivohen dhe ushqehen në një jetë shpirtërore të plotë dhe të tërësishme. Cilat janë mënyrat me të cilat je përpjekur të jetosh, që edhe brezat e ardhshëm të mund ta çmojnë tokën?
  • Ndërsa e dëgjon përsëri fragmentin biblik, imagjinoje veten të zhytur në këngë, në historinë e krijimit.

 

Bashkëbisedimi

Edhe pse në botën tonë ka plot tension, një ritëm të përshpejtuar, merr pak çaste për t`u vetëdijesuar, për ta dalluar, njohur dhe për ta çmuar krijimin e Hyjit. Shihe bukurinë e tokës rreth teje. Zgjoje në vetvete respektin e madh dhe çudinë, mahnitjen. Ofroja të gjitha mendimet dhe lutjet e tua Hyjit duke e falënderuar. Ndoshta dëshiron të kërkosh falje për mënyrat me të cilat të gjithë ne marrim pjesë në shkatërrimin e kësaj krijese të shenjtë. Bisedo me Hyjin për të gjitha ato që sheh dhe për ndjenjat që dalin nga kjo.

 

Përmbyllja
Të falënderoj, o Zot, për çdo nxitje që ma dhurove gjatë kësaj këtij meditimi mbi tekstin e Shkrimit Shenjt. Jezus dëshiroj të bëj atë që ke bërë titë gjej kohë për të qenë me Zotin – për ta parë dhe për të falënderuar për të mirat që na jep. Ti  s`e ke kaluar kohën në lutje me gjithë angazhimin me punë, por pikërisht për shkak të këtij angazhimi. Sa më shumë njerëzit kërkonin prej teje aq më shumë ti e kërkoje atë që Ati dëshironte prej teje.

Jezus, ti nuk ke qëndruar atje ku ishe i njohur por atje ku duhej të veproje. Shikimi i yt ishte shumë më i gjerë sesa ai i nxënësve të tu. Më ndihmo, o Zot që ta gjej dhe zbatoj misionin tim në jetë. Ati ynë…

Lavdi Atit e Birit e Shpirtit Shenjt. Si ka qenë në fillim, ashtu tash e përgjithmonë e jetës. Amen.

Shpërndaje

Comments are closed.

« »