Të Reja

Dashuria i del zot ligësisë së njeriut

Sep 27 • Meditimi i ditës

27 shtator 2019 – E premte, Shën Vinçenci i Paulit, MOMENTI I SHENJTË – Lutja e përditshme

(Leximet e ditës: Agj 1,15b – 2,9; Ps 43,1-4; Lk 9,18-22)

 

Prania e Hyjit

Në heshtjen e qenies sime më intime,
në fragmentet e unitetit tim shumë të dëshiruar,
a mund ta ndiej pëshpëritjen e pranisë së Hyjit?
A mund të më kujtohet kur e kam ndjerë afërsinë e Hyjit;
kur kemi ecur bashkë, duke i lejuar që të jem i përqafuar nga dashuria e Hyjit?

 

Liria

Pak janë ata njerëz që e kuptojnë
ç`do të mund të bënte Hyji me ta
po t`i dorëzoheshin në duart e tija
dhe po t`i lejonin t`i formojë hiri i tij. (Shën Injaci)
Lus për hirin e dorëzimit të plotë në dashurinë e Hyjit.

 

Ndërgjegjësimi

Më ndihmo, o Zot, që të bëhem edhe më i/e vetëdijshëm/e për praninë tënde.

Më mëso se si të të identifikoj në të tjerët.

Ma mbush zemrën me mirënjohje për të gjitha ato momente

kur nëpërmjet njerëzve të tjerë e ke treguar kujdesin për mua.

 

Fjala

Hyji i flet secilit prej nesh personalisht.

Duhet të dëgjoj në mënyrë që të dëgjoj çfarë dëshiron të më thotë.

Do ta lexoj tekstin disa herë, pastaj do të dëgjoj…

– – – 

Lk 9, 18-22

 

18 Ndërsa një ditë po lutej në vetmi ‑ ishin me të vetëm nxënësit e tij ‑ ai u bëri këtë pyetje:

“Kush thonë njerëzit se jam unë?”

19 Ata iu përgjigjën:

“Disa thonë se je Gjon Pagëzuesi, disa Elia, kurse disa të tjerë thonë se u ngjall një ndër profetët e vjetër.”

20 “Po ju ‑ i pyeti atëherë ata ‑ kush mendoni se jam unë?”

U përgjigj Pjetri:

“Ti je Mesia i Hyjit!”

21 Atëherë Jezusi i porositi të mos i tregojnë askujt.

22 E vazhdoi:

“Birit të njeriut i duhet të pësojë shumë, ta përbuzin pleqtë, kryepriftërinjtë dhe skribët, ta vrasin dhe të tretën ditë të ngjallet.”

– – – 

 

Ç` dëshiron të më thuash, Zotëri?

Disa mendime mbi tekstin e sotshëm të Shkrimit të Shenjtë:

 

  • Shën Lukën e tërheq lutja. Kështu që çdo vendim kyç të jetës së Jezusit e mbështjellë me lutje.
  • Shën Luka na inkurajon që edhe ne të bëjmë të njëjtën gjë – të lusim, nëse duam të gjejmë rrugën tonë drejt Hyjit.
  • Ta gjesh Zotin në vuajtje është diçka e vështirë. Kur Jezusi flet sesi duhet t`i nënshtrohet vuajtjeve të mëdha, ai dëshiron të thotë që këtë e vështron si të qenit pjesë e planit të Hyjit.
  • Tradita e krishterë flet për “dinamikën e Kryqit.” Kjo do të thotë se vuajtja e pashmangshme, kur pësohet me durim, i sjell të mira botës, sepse ajo zbulon dashuri të madhe. Do të përpiqem që të kem besim se kjo është kështu, të besoj në dëshminë e gjithë asaj që ne e quajmë e Premtja e Shenjtë (e Madhe). Atje, dashuria e madhe i del zot, e mposht ligësinë e njeriut, dhe kështu shpëtohemi.

 

Bashkëbisedimi

Fjalët nuk po më vijnë lehtë, o Zot.

Shiko në zemrën time dhe shih se sa shumë e dëshiroj paqen.
Më ruaj, o Zot. E di që gjithmonë je pranë meje

 

Përmbyllja

Të falënderoj, o Zot, për çdo nxitje që ma dhurove gjatë kësaj kohe sa luta mbi tekstin e Shkrimit  të Shenjtë.

Lavdi Atit e Birit e Shpirtit Shenjt

Si ka qenë në fillim, ashtu tash
e përgjithmonë e jetës. Amen

Shpërndaje

Comments are closed.

« »