Kujt i besohet shumë, prej tij kërkohet shumë

Oct 23 • Meditimi i ditës

23 tetor 2019 – E mërkurë, MOMENTI I SHENJTË – Lutja e përditshme

 (Leximet e ditës: Rom 6,12-18; Ps 124,1-8; Lk 12,39-48)

Prania e Hyjit

Për të hyrë në praninë e dikujt nevojitet që me sinqeritet t`i afrohem i tillë siç jam.

Në këtë moment, Hyji është këtu dhe më pret.

Zoti gjithmonë më afrohet i pari, dëshiron të më njohë më shumë se miku im më i mirë.

Do të ndalem një moment dhe do ta përshëndes Hyjin që më do.

Liria

Do ta lus Hyjin që të më ndihmojë

që të lirohem nga ankthet dhe brengat e mia,

që t`i çelem nëpërmjet kësaj kohe të lutjes,

në mënyrë që edhe më shumë ta dua dhe t`i shërbej.

Ndërgjegjësimi

 Në çka momentalisht në jetën time po e gjej shpresën, guximin dhe rritjen?

Duke u kthyer në mendime disa muaj prapa,

a jam i/e aftë ta vërej cilat janë ato aktivitete të mia që kanë dhënë fryte të mira?

Nëse kam vërejtur lëmi të tilla,

do të vendosi që edhe në të ardhmen t`u siguroj hapësirë dhe kohë.

Fjala e Zotit

Tani e lexoj pjesën e leximit të Shkrimit Shenjt që është parashikuar për sot.

Lexoj me vëmendje

dhe vërej fjalinë apo ngjarjen që më lë përshtypje.

Lk 12, 39-48

³⁹ E mos e harroni këtë gjë: po ta dinte i zoti i shtëpisë në cilën orë i vjen vjedhësi, nuk do të linte t’i thyehej shtëpia. ⁴⁰ Edhe ju, pra, jini gati, sepse Biri i njeriut do të vijë në atë çast kur s’jua merr mendja.”

⁴¹ Atëherë Pjetri tha:

“Zotëri, a po e thua këtë shëmbëlltyrë vetëm për ne, apo për të gjithë?”

⁴² Zotëria iu përgjigj:

“Cili, vallë, është ai mbarështues besnik e i mençur që do ta vërë zotëria përmbi shërbëtorët e tjerë për t’u dhënë në kohën e duhur pjesën e ushqimit? ⁴³ I lumi ai shërbëtor, të cilin, kur kthehet zotëria i tij, e gjen duke vepruar kështu. ⁴⁴ Përnjëmend po ju them: do ta vërë mbi të gjithë pasurinë e vet.

⁴⁵ Porse, po bëri e mendoi shërbëtori në zemrën e vet: ‘Zotëria im do të vonojë të kthehet’ dhe fillon të rrahë shërbëtorët e shërbëtoret, të hajë e të pijë e të dehet, ⁴⁶ zotëria i tij do të vijë atë ditë kur nuk e pret, atë orë që nuk ia merr mendja dhe do ta ndëshkojë rëndë e do t’ia japë fatin e të pafeve.

⁴⁷ Shërbëtori që e diti vullnetin e zotërisë e nuk u bë gati dhe nuk e kreu vullnetin e tij, do të marrë shumë të rëna. ⁴⁸ Ndërsa ai që nuk e diti, por bëri punë që duhet të ndëshkohen, do të rrihet më pak. Kujt iu dha shumë, prej tij do të kërkohet shumë; kujt iu besua shumë, prej tij do të kërkohet më shumë.”

Ç` dëshiron të më thuash, Zotëri?

 Disa mendime mbi fragmentin e sotshëm të Shkrimit të Shenjtë:

• Parabola (krahasimi) tregon se Jezusi është i vetëdijshëm se autoriteti dhe pushteti mund të keqpërdoren. Hyji e dëgjon britmën e të varfërve që janë të shtypur. Ai s`do t`i ndëshkojë rënd, t`i bëjë copë-copë njerëz të tillë (ata që kanë autoritet dhe fuqi), por zemrat e tyre do të jenë të grisura, copë-copë, derisa të kërkojnë falje prej viktimave të tyre dhe të pajtohen me ta.
• Bekoje punën time, o Zot. Së bashku me të gjithë anëtarët e Momentit të Shenjtë qofsha i/e drejtë në marrëdhëniet e mia të përditshme me njerëz dhe mos i fyefsha kurrë ata.

Bashkëbisedimi

 Si e kam përjetuar Fjalën e Hyjit? A më ka lënë të ftohtë?

A më ka ngushëlluar apo nxitur që të veproj më ndryshe?

E paramendoj Jezusin se si është duke qëndruar apo ulur pranë meje,

i drejtohem dhe i tregoj për të gjitha çfarë ndjej.

Përmbyllja

 Të falënderoj, o Zot, për këto pak momente që i kalova vetëm me ty. Ati ynë…

Lavdi Atit e Birit e Shpirtit Shenjt.

Si ka qenë në fillim, ashtu tash

e përgjithmonë e jetës. Amen.

« PAPA SHËN GJON PALI II  (1920-2005) – Në pesë vjetorin e shenjtërimit Zjarri i dashurisë së Jezusit »