Konferenca Ipeshkvore e Shqipërisë afër njerëzve të goditur nga tërmeti
Konferenca Ipeshkvore e Shqipërisë ka lëshuar një deklaratë për shtyp, me anë të të cilës shpreh afërsinë me të gjithë ata që janë goditur nga fatkeqësia natyrore e tërmetit. Në vijim deklarata e plotë.
Tiranë, 26/11/2019
Prot. nr. 44/19
NJOFTIM PËR SHTYP
Me rastin e katastrofës natyrore të tërmetit
Në këtë moment të thellë dhimbje për secilin nga ne dhe në veçanti për personat që më së shumti kanë vuajtur dhe po vuajnë pasojat natyrore të tërmetit, Kisha në Shqipëri me besimtarët e saj, por edhe Solidariteti i Kishave simotra nga vende të ndryshme të botës, shfaqin afërsinë e tyre të thellë.
Kemi shumëçka për t’i kërkuar Zotit në lutje sot: në veçanti do kujtojmë ato personat, jeta e të cilëve u ndërpre papritmas; familjarëve të tyre u shprehim ngushëllimin e sinqertë dhe lutjen e vazhdueshme për to. U jemi pranë të gjithë personave që nga kjo tragjedi natyrore kanë ngelur të plagosur, si një trup, po ashtu edhe në shpirt. Lutemi për shpresë dhe rimëkëmbje, që nga kjo dhimbje të dalim më të fortë. U qëndrojmë pranë dhe i mbështesim të gjitha strukturat e kërkimshpëtimit aktivisht të angazhuara në shpëtimin e njerëzve.
Përveç lutjes drejtuar Zotit për jetët e humbura dhe për familjarët e tyre, ne si Kishë, kemi aktivizuar strukturat tona të bamirësisë dhe të ndihmës për t’u ardhur në ndihmë shtresave dhe popullatës që më së shumti janë goditur nga kjo valë shkatërruese.
Gjithashtu urdhërojmë meshtarët tanë që sot dhe nesër të kremtojnë meshën “Në kohën e Termetit”, në Mesharin, fq. 949. Hyjit Krijues i lutemi dhe Atij i besohemi.
Ipeshkvijtë në Shqipëri
« Caritas Kosova niset për Shqipëri për të ndihmuar zonat e prekura nga tërmeti Caritas Kosova ndihmon në zonën e prekur të tërmetit në Shqipëri »
