Koncerti i Koreve të Famullive për Krishtlindje 2019

Jan 1 • Kisha në Kosovë, Kulturë

Me iniciativën e ipeshkvit tonë Mons. Dodë Gjergjit, me punën e koordinatorit dioqezan të këngës kishtare Don Shtjefën Dodes, sivjet u organizua koncerti i Krishtlindjes i Koreve të Famullive të Dioqezës Prizren-Prishtinë.

Të dielën, më 29 dhjetor, në orët e pasdites së vonë, u mblodhën 7 Kore në Qendrën “BogdaniPolis” – që gjendet nën Katedralen Shën Nënë Tereza në Prishtinë, që në atmosferë të Krishtlindjes të afrohen dhe njihen në mes vete, të nxisin shpirtin kreativ dhe të urojnë njëri-tjetrin për festa, nëpërmjet këngës.

Mbrëmja pati edhe karakter garues duke i dhënë një shije paraprake, si uverturë, e festivalit që do të mbahet vitin e ardhshëm 2020. Tri vendet e para fituan nga një shpërblim modest. Sipas vlerësimit të udhëheqësve të koreve dhe jurisë në krye me pianisten Lule Elezi dhe profesoreshën e solfegios Kristina Palokaj Perkola, vendi i parë i takoi famullisë së Pejës. Për vendin e dytë u zgjodh famullia e Stubllës. Kurse vendin e tretë e zuri famullia e Doblibarës dhe ajo e Llapushnikut & Kravasarisë.

Shtatë famullitë pjesëmarrëse (sipas ABC-së) në koncertin e Krishtlindjes 2019 – Prishtinë ishin:

Kori i Famullisë së Doblibares, me këngën “Emanuel”.

Kori i Famullisë së Gllogjanit, me këngën “O i vërteti Biri i Zotit”

Kori i Famullisë së Llapushniku & Kravasaria, e këngën “Jehun dëgjo”

Kori i Famullisë së Novosellës, me këngën “O natë e shenjtë (O Holy night)”

Kori i Famullisë së Pejës, me këngën “Gloria – Plima, plima” (Herthar Meyer)

Kori i Famullisë së Stubllës, me këngën “Adeste fideles”

Kori i Famullisë së Zymit, me këngën “Ave Maria”

Në fjalimin e tij të rastit ipeshkvi Mons. Dodë Gjergji i falënderoi dhe lavdëroi të gjithë udhëheqësit e pjesëmarrësit duke iu thënë se e meritojnë që pas gjithë aktiviteteve për festa të mund të mblidhen dhe të festojnë një mbrëmje së bashku. Njëherësh e bëri të njohur festivalin e këngës së krishterë që do të mbahet në vitin 2020. Që tani koret e famullive mund të përgatiten për këtë eveniment dioqezan.

Gjatë darkës së përbashkët u kënduan edhe këngë rasti, qytetare dhe argëtuese, prej individëve kreativë nga famulli të ndryshme duke krijuar kështu një atmosferë gazmore dhe familjare.

Të gjithë pjesëmarrësit i falënderojmë për gatishmërinë, angazhimin e tyre, atmosferën dhe emocionet që zgjuan te të gjithë të pranishmit me këngët e tyre. Zoti i shpërbleftë me të mirat e veta – Ai ju dhëntë ide të mira, kreativitet, durim, vullnet të mirë e mbi të gjitha dashuri për t`i dhënë nder e lavd Zotit edhe në vazhdim!/drita.info

Shpërndaje

Comments are closed.

« »