Të Reja

O Zot, më ndihmo të mos kem frikë nga njerëz paranoikë

Jul 1 • Meditimi i ditës

1 korrik 2020 – E mërkurë, MOMENTI I SHENJTE – Lutja e përditshme

 (Leximet e ditës: Am 5, 14-15.21-24; Ps 50, 7-14.16b-17; Mt 8, 28-34)

 

 Prania e Hyjit

Kur jam i grishur në shoqërim me mikun,

Mezi pres të takohem dhe e ndjej veten se më bëhet nder.

Kur më grish Hyji që ta kaloj një kohë në afërsinë e tij,

Ai dëshiron që ta njoh dhe ta ndjej dashurinë e tij.

Në fe dhe shpresë e hap mendjen dhe zemrën ndaj Hyjit,

Dhe e lus që të më ndihmojë që të bëhem edhe më i vetëdijshëm për dashurinë dhe praninë e tij.

 


Liria

Duhet të shkëputem nga zhurma; të ngrihem përmbi zhurmën;

zhurmën që e ndërpret marrëdhënien e lidhur, që ndan.

Duhet t`i kthehem dëgjimit të Hyjit.

 


Ndërgjegjësimi

Jetoj në rrjetën e ndërthurur me marrëdhënie – me lidhje të shumta me natyrën, me njerëz, me Hyjin.

I vërej këto lidhje dhe falënderoj për jetën që rrjedhë nëpërmjet tyre.

Disa prej këtyre lidhjeve janë të shtrembëruara, disa të prishura, disa të ndërprera:

Ndoshta për shkak kësaj ndjehem i mërzitur, i zemëruar, i zhgënjyer.

Lus për hirin e pranimit dhe faljes.

 


Fjala

Fjala e Zotit na vjen nëpërmjet Shkrimit të Shenjtë.

Shpirti Shenjt e ndriçoftë mendjen dhe zemrën time që t`i përgjigjem porosisë së ungjillit:

Që t`i dua të afërmit e mi si vetveten dhe që të kujdesem për vëllezërit dhe motrat në Krishtin.

 

 

Mt 8,28-34

 

28 Sapo kaloi në bregun tjetër ‑ në krahinën e gadarenëve, dy të djallosur që dolën nga varret, i erdhën para. Ishin aq të rrezikshëm, sa që askush s’guxonte të kalonte asaj rruge. 29 Dhe ja, bërtitën:

“Çka do prej nesh, o Biri i Hyjit? A erdhe këtu të na mundosh para kohës?”

30 Jo larg tyre kulloste një tufë e madhe derrash. 31 Shpirtrat e këqij iu lutën Jezusit:

“Meqë po na dëbon, na ço në tufën e derrave!”

32 Ai u tha: “Shkoni!”

Ata dolën e hynë në derra. Dhe ja, mbarë tufa u lëshua me turr e prej greminës ra në det dhe u mbyt në ujë. 33 Barinjtë ikën, e si mbërritën në qytet, treguan gjithçka, veçanërisht për të djallosurit. 34 Dhe ja, mbarë qyteti i doli para Jezusit. Kur e panë, iu lutën të largohej prej krahinës së tyre.

 

 


Ç`dëshiron të më thuash, Zotëri?

Disa mendime mbi paragrafin e sotshëm të Shkrimit të Shenjtë:

 

  • O Zot, nganjëherë kam pasur frikë nga njerëzit e marrë apo paranoikë, që nganjëherë bëheshin të çuditshëm dhe të paparashikuar. Ti nuk ke pasur frikë nga demonët lakuriqë, ata kanë pasur frikë prej teje. Në ty po e ndjej fuqinë që mund t`i rezistoj çdo të keqeje dhe ta mundë atë. Është fakt i hidhur se njerëzit e atij vendi kishin pasur frikë nga njeriu i cili megjithatë kishte mbledhur fuqi për të vendosur që t`i afrohet Jezusit; nuk kanë dashur ta kenë pranë vetes.
  • Si e ndjej unë veten dhe çfarë qëndrimi kam kur ballafaqohem me njerëz të veçantë?

 

 

Bashkëbisedimi

Komunikimi nënkupton bisedimin dhe dëgjimin.

Ndërsa bisedoj me Jezusin, duhet të jem i gatshëm edhe të dëgjojë gjithçka ai dëshiron të më thotë.

Do ta imagjinoj butësinë dhe mirësinë në sytë e Jezusit dhe buzëqeshjen plot dashuri ndërsa ai më vështron.

Mund të jem krejt i sinqertë me Jezusin ndërsa ia besoj të gjitha brengosjet dhe gëzimet e mia.

Ia hap zemrën time ndërsa i flas për frikësimet dhe dyshimet e mia.

Do ta lus që të më ndihmojë që plotësisht të mund t`i besohem kujdesit të tij,

i vetëdijshëm se ai gjithmonë e di çfarë është gjëja më e mirë për mua.

 


Përmbyllja

Ati ynë…
Lavdi Atit e Birit e Shpirtit Shenjt.
Si ka qenë në fillim, ashtu tash
e përgjithmonë e jetës. Amen.

Shpërndaje

Comments are closed.

« »