A e falënderon Zotin që mund të bësh mirë?

Jul 28 • Meditimi i ditës

28 korrik 2020 – E marte, Shën Alfons Liguori, MOMENTI I SHENJTË – Lutja e përditshme 

(Leximet e ditës: Dal 33,7-11; 34,5b-9.28; Ps 103,6-13; Mt 13,36-43) 

Prania e Hyjit 

Para se të fillosh tërheqjen tënde shpirtërore, pusho një moment duke i lënë mënjanë shpërqendrimet. 

Qetësohu dhe fokusoje mendjen dhe zemrën tënde në praninë e dashur të Zotit, 

i cili është me ty ndërsa po nisesh në këtë rrugëtim. 

Liria 

Kur e ndiej veten të robëruar dhe kur gjithçka më tendosë, më ngarkon, 

madje edhe atëherë kur rrezet e diellit nuk arrijnë në vendin ku ndodhem, 

edhe atëherë, në heshtjen e heshtjes, shpirti im është i lirë dhe i papenguar. 

Në këtë liri të shpirtit po të drejtohem ty. 

Ndërgjegjësimi 

Në praninë e Krijuesit që më do, 

me sinqeritet i vështroj përjetimet e ditës së kaluar, 

ngritjet në maja e uljet poshtë si dhe rutinën, atë klimën mesatare të së përditshmes. 

A mundem ta shoh ku ka qenë Zoti i pranishëm në të gjitha këto? 

Fjala 

Tani e lexoj pjesën e leximit të Shkrimit e Shenjtë që është parashikuar për sot. 

Dëgjoj me mend e zemër 

dhe vërej fjalinë apo ngjarjen që më flet diçka. 

Mt 13,36-43 

³⁶ Atëherë e shpërndau turmën dhe hyri në shtëpi. Nxënësit iu afruan dhe e pyetën: 

“Na e shtjello shëmbëlltyrën e egjrës së arës.” 

³⁷ Ai u përgjigj: 

“Ai që e mbjell farën e mirë, është Biri i njeriut. ³⁸ Ara është bota. Fara e mirë janë ata që i përkasin Mbretërisë. Egjra paraqet ata që i përkasin Qoftëlargut. ³⁹ Armiku që mbolli egjrën është djalli. Korrja është mbarimi i botës. Korrtarët janë engjëjt. ⁴⁰  

Siç mblidhet egjra e digjet në zjarr, kështu do të ndodhë në mbarimin e botës. ⁴¹ Biri i njeriut do t’i dërgojë engjëjt e vet për t’i mbledhur në Mbretërinë e tij të gjithë ngashnjyesit dhe ata që bëjnë keq, ⁴² e do t’i hedhin në furrë të ndezur, ku do të jetë vaj e kërcëllim dhëmbësh. ⁴³ Kurse të drejtët, atëherë, do të shndrisin porsi dielli në Mbretërinë e Atit të tyre. 

Kush ka veshë, le të dëgjojë!” 

Ç`dëshiron të më thuash, o Zot? 

Disa mendime mbi tekstin e sotshëm të Shkrimit të Shenjtë: 

• Jezusi përdor imazhin e arës për të shpjeguar praninë e së mirës dhe së keqes në botë dhe për të treguar se si këto forca manifestohen në fundin e kohës. Farën e mirë e mbjellë Jezusi, që me dritën dhe dashurinë e tij më ndihmon të rritem në mënyrë që të mund të jap shumë fryt, dhe të shkëlqej si dielli në Mbretërinë e Qiellit. 
• Shpreh falënderimet e mia për frytet e besimit dhe mirësisë me anë të të cilave Jezusi vepron në jetën time. Ia paraqes të gjitha dobësitë që mund të pengojnë rritjen time si fëmijë i Hyjit. Ndërsa e dëgjoj sërish pjesën e ungjillit, në dritën e dashurisë së madhe të Krishtit ndaj meje, lutem për faljen e mëkateve. 

Bashkëbisedimi 

 “Biri i njeriut do të dërgojë engjëjt e vet.” Jezusi thotë se Zoti do të zgjidhë gjithçka në fund. Në ndërkohë, ne nuk duhet të na rritet mendja që jemi gjyqtarë sepse nuk mund ta ndajmë grurin nga egjra. 

E vërej se Jezusi i quan të lum jo ata që duken të lum në sytë e botës – fitimtarë do të thoshim – por ata që bota i konsideron humbës. Gjykimi përfundimtar mund të vijë si një surprizë e madhe për “fituesit” dhe “humbësit”. 

Përmbyllja 

Po të falënderoj, o Zot, që munda t`i kaloj këto pak momente vetëm me ty. 

O Zot i mirë, ma hap zemrën dhe bëj që hiri yt të më befasojë dhe bëj t`i shoh fëmijët e tu në fytyrat e të gjithëve që i takoj. Ati ynë… 

Lavdi Atit e Birit e Shpirtit Shenjt. 

Si ka qenë në fillim ashtu tash 

E përgjithmonë e jetës. Amen. 

« Besimi zhvillohet me shpejtësinë e vet Motra Ruth, “Nënë Tereza” e të harruarve të Pakistanit »