Si e dëgjojmë atë që është duke na thënë Zoti?

Dec 13 • Meditimi i ditës

13 dhjetor 2019 – E premte, Shën Lucia, MOMENTI I SHENJTË – Lutja e përditshme

(Leximet e ditës: Is 48,17-19; Ps 1,1-4.6; Mt 11,16-19)

 

Prania e Hyjit

Ndërsa je duke e filluar këtë tërheqje, pusho një moment të shkurtër për ta drejtuar vëmendjen tënde në brendësi.

Merr tri herë frymë thellë, relaksohu dhe njihe që je në praninë dashuruese të Zotit, i cili është me ty ndërsa po e fillon këtë udhëtim të zhvillimit dhe zbulimit.

 

Liria

Do ta lus Hyjin që të më ndihmojë
që të lirohem nga ankthet dhe brengat,
që t`i çelem gjatë kësaj kohe të lutjes,
në mënyrë që të mund ta dua dhe t`i shërbej edhe më shumë.

 

Ndërgjegjësimi

Në këtë moment, o Zot, po i drejtoj mendimet e mia kah Ti.

Do t`i lë mënjanë punët dhe preokupimet e mia.

Do të pushoj dhe rifreskohem në praninë tënde, o Zot.

 

Fjala e Zotit

O Zot, je bërë njeri për të biseduar me mua;
ke ecur dhe punuar përmbi këtë tokë; ke pësuar të nxehtët dhe të ftohtët.
Koha që e ke kaluar mbi tokë ka qenë e mbushur me kujdesin për njerëz.
Ke shëruar të sëmurë, ke ringjallur të vdekur; dhe ajo më e rëndësishmja – më ke shpëtuar nga vdekja.

 

Mt 11, 16-19

 

16 Me kë ta krahasoj këtë brezni? U përngjet djaloshave që rrinë në sheshe e u thërrasin shokëve 17 e u thonë:

‘Ne u ramë për ju fyejve e ju nuk kërcyet;

bëmë gjëmë e ju nuk vajtuat!’

18 Erdhi Gjoni: ai s’ha as s’pi e thonë: ‘Është i djallosur! 19 Erdhi Biri i njeriut: ai ha e pi, e thonë: ‘Ja, grykësi e pijaneci! Miku i tagrambledhësve dhe i mëkatarëve!’ Por dija përligjet nga veprat e veta!”

 

Ç`po dëshiron të më thuash, Zotëri?
Disa mendime mbi paragrafin e sotshëm të Shkrimit të Shenjtë:

 

  • Jezusi i vëren ata që rrinë duarkryq dhe s`bëjnë asgjë, vetëm kritikojnë të tjerët. Gjoni iu duket i çuditshëm, ndërsa Jezusi (“shumë”) normal. A jam edhe unë cinik dhe kritik? A i nënvleftësoj përpjekjet e përvuajtura të të tjerëve ndërsa janë duke u përpjekur për të bërë atë më të mirën që munden?
  • A u jap veprave të mira dëshmi të denjë besimi në Jezusin? Vepra të tilla mund edhe të kushtojnë, por në fund të fundit do të provohen se kanë qenë vendime të mençur

 

Bashkëbisedimi

Jezus, po më flet personalisht në tekstin e Shkrimit të Shenjtë.

Bëj që t`i përgjigjem thirrjes tënde të sotshme.

Më mëso ta dalloj dorën tënde në veprim në jetën time të përditshme.

 

Përmbyllja

Të falënderoj, o Zot, që munda t`i kaloj këto momente vetëm me ty. Ati ynë…
Lavdi Atit e Birit e Shpirtit Shenjt. Si ka qenë në fillim, ashtu tash e përgjithmonë e jetës. Amen.

 

KUJDESI SESI DËGJON

Disa mendime mbi paragrafin Mt 11, 16-19 të Shkrimit të Shenjtë

 

Pasazhi i sotëm i ungjillit bën fjalë për mënyrën sesi dëgjojmë atë që është duke na thënë Zoti. Kjo çështje vijon të trajtohet menjëherë pas pasazhit rreth Gjon Pagëzuesit, njeriut që përgatit rrugën për ardhjen e Mesisë. Pasazhi përfundon me fjalët, “Kush ka veshë për të dëgjuar, të dëgjojë.”
Jezusi i qorton njerëzit për shkak se nuk e dëgjonin. Ai i krahason ata me fëmijë në treg të cilët ankohen për bashkëlojtarët e tyre: ” Ne u ramë për ju fyejve e ju nuk kërcyet; bëmë gjëmë e ju nuk vajtuat!’.”

Kështu, kur Gjoni erdhi me rreptësi të madhe, as nuk hante, as nuk pinte, agjëronte dhe veshte rroba prej leshi të devesë, populli thoshte se ishte i pushtuar nga shpirti i keq. Në anën tjetër, kur Jezusi erdhi, ky “hante e pinte”, ata thoshin: “Ja, grykësi e pijaneci! Miku i tagrambledhësve dhe i mëkatarëve!”
Në qoftë se nuk duam të dëgjojmë atë që është duke na thënë Hyji nëpërmjet njerëzve dhe situatave në jetën tonë, mund të ndodhë që aq lehtë të racionalizojmë dhe të refuzojmë brishtësinë e bartësit dhe në proces të refuzojmë edhe Ungjillin, – që në fakt është mjaft i palogjikshëm. “Një prift më ka bërtitur në rrëfim kështu që unë nuk shkoj më në kishë.” Kjo do të ishte si të refuzoj demokracinë për shkak të korrupsionit të një zyrtari të zgjedhur në mënyrë demokratike.

Ne kemi nevojë për të dalluar shumë qartë mes vizionin qendror të Mbretërisë të cilën Jezusi na ka lënë dhe mënyrave në të cilat ai vizion është jetuar nëpër shekuj. Ishte Pali i cili pat thënë shumë kohë më parë se ne të krishterët e mbartim mesazhin e Ungjillit në enë argjile, që thyhet lehtë, që shpesh herë rrjedh. Është e rëndësishme për ne që të kuptojmë se Hyji mund dhe flet me ne nëpërmjet shumë mediume dhe ndërmjetësues të papritur. Është ndoshta e vërtetë të thuhet se disa nga shenjtërit më të mëdhenj kanë pasur dobësi serioze. Në fakt, shumë prej tyre u bënë shenjtër për shkak të dobësive të tyre dhe nëpërmjet dobësive të tyre (krh. 2 Kor 12, 7-10, ku Pali falënderon Hyjin që është duke vepruar nëpërmjet dobësive të tij).

Është e rëndësishme, meqë Jezusi na nxit, që me të vërtetë të përpiqemi ta dëgjojmë thelbin e asaj që Jezusi na ka lënë, vizionin e tij të Mbretërisë. Shumë pak prej nesh e dëgjojmë mesazhin pa ndonjë formë filtrimi për shkak të historisë sonë apo veçantive tona personale. Si predikues, shpesh them se kur predikoj për 20 persona, 20 mesazhe të ndryshme dëgjohen. Dhe nuk ka asgjë të keqe këtu me kusht që secili prej nesh vërtetë të përpiqet të dëgjojë atë që Hyji është duke thënë për mua dhe jo menjëherë ta largojmë prej vetes diçka që mua nuk më pëlqen të dëgjoj.

Pasazhi përmbledhet bukur në frazën e fundit: “Dija (urtësia) përligjet nga veprat e veta!” Jezusi është mishërim i Urtësisë së Hyjit. Jezusi nuk ka nevojë për justifikim për rezultatet e jetës së tij të shfaqura në të gjitha ato që ka thënë dhe bërë, sidomos me manifestimin përfundimtar të dashurisë së treguar në kryq. Dhe e njëjta gjë mund të jetë e vërtetë për secilin prej nesh.

(livingspace.sacredspace.ie; Përktheu: Don Shtjefën Dodes)

Shpërndaje

Comments are closed.

« »