Arkmorti i shkrimtarit Ismail Kadare, i vendosur në sallën e Operës dhe Baletit në Tiranë, për homazhe në ditëvarrimin e tij, më 3 korrik 2024, rrinte nën siluetën e Shën Nënë Terezës me duart e saja lutëse dhe rruzaren e shenjtë që ajo gjithmonë e kishte sa ishte në tokë. Me këtë pamje të veçantë, sikur Shenjtëresha jonë po lutej për Shkrimtarin në arkmortin e tij, u përcoll në banesën e amshuar. Po çfarë mendimi kishte Shkrimtari për Nënën Shenjtëreshë? Ja vlerësimi i tij.
“Nënë Tereza dhe Gjergj Kastrioti, dy personazhet më të mëdhenj të kombit tonë dhe ndër dy më të mëdhenjtë e Evropës e të njerëzimit mbarë, sado të largët të jenë në kohë e sado të ndryshëm në trajtë, për ne, shqiptarët, kanë një gjë sublime që i bashkon…
Gjergj Kastrioti, simboli i vullnetit tonë për liri dhe për qytetërim evropian, libri i Gjon Buzukut, mishërimi i etjes së shqiptarëve për kulturë dhe dritë, dhe Nënë Tereza, mesazhi ynë i madh i harmonisë, përdëllimit dhe dashurisë për popujt dhe njerëzimin mbarë, janë vlerat tona morale që do të na shoqërojnë përherë në rrugëtimin tonë të madh”.
“Nënë Tereza ka marrë në telefon Bill Clintonin dhe i ka thënë: Biri im, bëj diçka për shqiptarët e mi”, – ka thënë më parë, shkrimtari i madh shqiptar, Ismail Kadare.
“Duke ia thënë kjo Nënë e Kishës, Clintonit, ai çlirohet nga çdo skrupull moral, sepse atij po i thotë një njeri i shenjtë. Ajo theu ligjin e fesë për popullin e saj, theu rregullin e fesë për shqiptarët e saj. Me këtë, ajo i ka larë të gjitha.
E turpi ynë, i përbashkët është për sharjet ndaj Nënë Terezës”, – u shpreh Kadare, në vlerësimin e tij për Nënë Terezën.
Ismail Kadare, Einsidel, 30.10.2005.
Përgatiti për Dritën: Don Lush Gjergji
Postimi i Mëparshëm
Postimi Tjetër
